«Тоттенхэмнің» жаңа бапкері Роберто Де Дзерби «Марсельде» жұмыс істеген кезде Мэйсон Гринвуд туралы айтқан сөздері үшін кешірім сұрады, деп хабарлайды QazFootMedia.kz сайты.

Бұған дейін «шпор» жанкүйерлерінің түрлі топтары италиялық маманның ағылшын футболшысын қорғаған мәлімдемесіне байланысты наразылық білдірген еді. Еске салсақ, «Манчестер Юнайтедтің» бұрынғы ойыншысы 2022 жылы қызға зорлық көрсетті деп айыпталған, алайда 2023 жылы айыптар алынып тасталды. Роберто сол кезде Мэйсонды «жақсы жігіт, бірақ ауыр баға төлеген адам» деп атаған.

– Жанкүйерлер сіздің «Марсельде» айтқан сөздеріңізге алаңдаулы. Осыған қатысты не айтасыз?
– Мен бұл сұраққа итальян тілінде жауап бергім келеді, себебі ойымды барынша анық жеткізгім келеді.

Мен ешқашан әйелдерге қатысты зорлық-зомбылық мәселесін немесе кез келген зорлық-зомбылықты жеңілдеткім келген жоқ. Өмірде мен әрдайым әлсіз, қорғансыз адамдарды қорғап келдім. Әрқашан қауіп-қатерде тұрғандардың жағында болдым.

Мені жақсы танитын адамдар біледі: мен көбірек жеңіс немесе титул үшін өз ұстанымымнан бас тартатын адам емеспін.

Егер бұл тақырып біреудің көңіліне тиген болса, кешірім сұраймын. Менің қызым бар, сондықтан мұндай мәселелерге өте сезімталмын және әрдайым солай болып келдім.

Уақыт өте келе адамдар мені жақсырақ танып, сол сәтте қандай да бір нақты позиция ұстанғым келмегенін түсінеді деп үміттенемін, – деді Де Дзерби.